نحب نعيش…

د. جلال الطويهري

“نحب نعيش… وفي بلادي مخلونيش .. كلمة بسيطة أما وراها جبال من الوجيعة ، نحب نعيش كيما الناس اللي أحلامهم ما تتقصش قبل ما تولد كيما العيون اللي ما تخافش من غدوة وكيما القلوب اللي ما تتعلمش تصبّر روحها أكثر من اللازم”.

نحب نعيش… أما في بلادي ما خلونيش.

كبرنا وإحنا نقول غدوة خير وغدوة تعدي وتشد معاها شوية من روحنا تمنينا طرق مفتوحة فرص عادلة وطن يفهمنا قبل ما يحاكمنا يحتوينا قبل ما يجرحنا أما الحقيقة كانت قاسية… قاسية لدرجة خلت الواحد يحس روحه ضيف في بلاده، يترقب، يتنازل، ويتحمل فوق طاقته  ماذنب الشباب اللي كي يحلم يقولوله مستحيل ، ما ذنب اللي قلبه معلق بالبلاد أما البلاد معلقة بسقف ما يطيح كان عليه؟ نحب نعيش… كلمة تخرج من الحناجر اللي تعبت، من صدور ضاقت بالضغط والهم ومن عقول عايشة بين الرحيل والبقاء.

ومع هذا…
مازلنا نحب بلادنا على خاطر الحب الحقيقي ما ينقطعش ولو بالقهر بلادي وإن جارت عليا عزيزة وأهلي وإن ظلموني كرام مازال في القلب ركن صغير يقول يمكن… يمكن نهار نلقي بلاصتنا يمكن يجي نهار نعيش فيه بلا خوف بلا قيود بلا وجيعة متاع الفرص الضايعة.

نحب نعيش…مش طلب كبير.
طلب حقي وحق كل إنسان وحق كل مواطن تعب من الوقوف على نفس الباب اللي ما يفتحش وحتى لو قالوا ما خلّوكمش…
نرجع نقول يكفينا نحلم… خاطر الأحلام هي آخر حاجة ما ينجم حد ياخذها منا.